Rannsóknarnefnd um sparisjóðina tilkynnti ríkissaksóknara um 21 mál þar sem grunur leikur á að málin snerti refsivert athæfi sem öll varða fangelsisrefsingu. Þetta kemur fram í skýrslu nefndarinnar sem birt var í dag. Um er að ræða ákvæði laga sem varða takmarkanir á stórum áhættum og þátttöku stjórnarmanna í meðferð mála. Þá var tilkynntur grunur um eitt brot gegn ákvæðum laga um einkahlutafélög, þar sem lagt er bann við lánveitingum til að fjármagna kaup á hlutum í félaginu, auk þess sem rannsóknarnefndin tilkynnti embætti ríkissaksóknara um þrjú mál þar sem nefndin taldi vafa leika á að farið hefði verið fyllilega að ákvæðum laga um endurskoðendur.

Fram kemur í skýrslunni að engin gögn sem aflað var í þágu rannsóknarinnar hafi fylgt tilkynningunum, þar sem lög um nefndina veita ekki heimild til að nota upplýsingar sem einstaklingur hefur veitt nefndinni sem sönnunargagn í sakamáli sem höfðað gæti verið gegn honum.

Fram kemur að af málunum sem voru send hefur tveimur verið lokið með þremur dómum Hæstaréttar, auk þess sem einum héraðsdómi hefur verið áfrýjað til réttarins.