„Ég sé endalaus tækifæri á Reykjanesskaganum eins og hann leggur sig. Við höfum gengið í gegnum þrengingar eins og aðrir en það er bjart framundan,“ segir Kjart­an Már Kjart­ans­son, nýráðinn bæjarstjóri Reykjanesbæjar. 

Kjartan tekur við starfinu þann 1. september og segir breytingar alltaf fylgja nýju fólki, þótt ótímabært sé að segja til um hverjar þær verða. „Ég tel mig þekkja nokkuð vel til eftir að hafa verið bæði starfsmaður bæjarfélagsins og setið í bæjarstjórn í tvö kjörtímabil fyrir mörgum árum, en ég þarf þó að gefa mér tíma til þess að kynnast þessu öllu saman upp á nýtt,“ segir hann.

Stjórnmálaskoðanir skipta ekki máli

Kjartan er ekki flokksbundinn neinu stjórnmálaafli í dag og telur hann það ekki skipta máli fyrir starfið. „Ég held að það skipti í sjálfu sér ekki máli hvort menn séu flokksbundnir. Ég lít fyrst og fremst á mig sem fagstjórnanda. Ég kem að málinu sem slíkur og mín menntun og reynsla er á því sviði. Hvort ég hafi pólitískar skoðanir nú eða hafi haft þær áður skiptir ekki máli,“ segir hann.

Kjart­an er rekstr­ar­hag­fræðing­ur MBA frá Viðskipta­fræðideild Há­skóla Íslands og hef­ur sl. sex ár starfað sem fram­kvæmda­stjóri Secu­ritas á Reykja­nesi. Þar áður hefur hann gegnt stjórnunarstöðu í ýmsum fyrirtækjum.

Fyrri frétt mbl.is: Kjartan verður bæjarstjóri