Vinir og vandamenn Robin Williams minntust leikarans við athöfn sem fór fram í kyrrþey í Curran Theatre í San Francisco í gær.

Bandaríska tímaritið Hollywood Reporter greinir frá þessu. Mörg hundruð gestir mættu en eiginkona Williams og börn voru einnig viðstödd minningarathöfnina, en þar var leikin tónlist og myndskeið sýnd þar sem Williams var minnst og honum vottuð virðing.

Williams framdi sjálfsvíg á heimili sínu í Kaliforníu í síðasta mánuði. Hann var 63 ára gamall. Williams hafði glímt við þunglyndi. 

Tónlistarmaðurinn Stevie Wonder lék tónlist fyrir gesti. Á meðal annarra gesta voru vinir Williams, en á meðal þeirra má nefna Billy Crystal, Whoopi Goldberg, Bette Midler, Ben Stiller, George Lucas, Danny De Vito og Jeff Bridges.

AFP