Jón H.B. Snorrason, aðstoðarlögreglustjóri höfuðborgarsvæðisins og saksóknari, mun ekki koma að fleiri verkefnum fyrir sérstakan saksóknara eftir að vinnu hans að núverandi verkefnum lýkur. Þetta staðfestir Ólafur Þór Hauksson, sérstakur saksóknari.

Eins og greint var frá á mbl.is í gær greiddi sérstakur saksóknari Jóni H.B. rúmar 18 milljónir króna fyrir lögfræðiráðgjöf á árunum 2010-2014. Á sama tíma var Jón H.B. í fullu starfi hjá embætti lögreglustjórans á höfuðborgarsvæðinu.

Ólafur Þór segir í skriflegu svari við fyrirspurn mbl.is að verkefni Jóns H.B. hjá embættinu séu langt á veg komin og vinnu hans fari þar af leiðandi að ljúka. Ekki hefur verið verið ráðgert að fá hann að fleiri verkefnum fyrir embættið. „Hvort það verður leitað til hans einhvertíma síðar skal ósagt látið en eins staðan er nú þá eru ekki áform um það,“ segir Ólafur Þór.

Spurður um ástæður þess að Jón H.B. hættir störfum fyrir embætti sérstaks saksóknara vísar Ólafur Þór til þess að embættið hafi verulega lækkað útgjöld sín í tengslum við aðkeypta sérfræðiaðstoð. meðal annars vegna lækkunar á fjárheimildum.