Viðskiptavinum Bernhöftsbakarís við Bergstaðastræti brá heldur betur í brún þegar þeir sáu tilkynningu um að rúnstykkin í bakaríinu, sem undanfarin 10 ár hafa kostað 50 krónur stykkið, höfðu hækkað um 30 krónur, heil 60%, og kosta nú 80 krónur. 

Nútíminn greindi frá málinu í dag, en þar segir: 

„„Kæri viðskiptavinur, allt tekur að lokum enda.“

Svona hefst tilkynning sem blasti við viðskiptavinum Bernhöftsbakarís á Bergstaðarstræti í morgun.

Rúnstykkin kosta ekki lengur 50 krónur í Bernhöftsbakaríi, einu ástsælasta bakaríi borgarinnar, heldur 80 krónur. Í morgun var tilkynnt um hækkun á rúnstykkjunum og ástæðan er hækkun á lægra þrepi virðisaukaskatts upp í 11 prósent. Hækkunin tók gildi um áramót.“

Í tilkynningunni frá bakaríinu segir eftirfarandi: „Kæru viðskiptavinir, allt tekur að lokum enda. Við matarskattshækkunina núna um áramótin neyðumst við til þess að hækka verðið á rúnstykkjunum okkar. Við höfum boðið rúnstykkin á 50 krónur í heil 10 ár, þrátt fyrir allt það sem gengið hefur á í samfélaginu.

Við getum ekki lengur haldið því lága verði sem var. Þörfin fyrir hækkun hefur vaxið mikið síðustu árin. Eftir mikla yfirlegu verður verðið 80 krónur sem engu að síður er hálfvirði miðað við það sem samkeppnisaðilarnir bjóða upp á. Við munum áfram kappkosta að bjóða eins sanngjörn verð og mögulegt er.“