Aðildarfélög Starfsgreinasambands Íslands (SGS), að Flóanum undanskildum, hafa skilað tillögum sínum að kröfugerð til sameiginlegrar samninganefndar.

Nefndin kemur saman til fundar á morgun þar sem semja á eina sameiginlega kröfugerð fyrir komandi kjaraviðræður.

Af samtölum við formenn aðildarfélaganna í gær má ráða að þungt hljóð er í mönnum og viðbúið að kjaraviðræður verði erfiðar, að því er fram kemur í umfjöllun um kjaramálin í Morgunblaðinu í dag. Rauði þráðurinn í kröfugerðinni, samkvæmt upplýsingum blaðsins, er að lágmarkslaun hækki miðað við aðra hópa og taki mið af viðurkenndum framfærsluviðmiðum upp á 300 þúsund krónur á mánuði. Í dag eru lágmarkslaun um 214 þúsund.