Stefán Sverrisson stóð uppi sem sigurvegar í Biggest Loser Ísland 2 á fimmtudaginn. Stefán hafði misst tæp 60 kíló og var gjörbreyttur í útliti frá því að hann birtist fyrst á skjánum í janúar. „Ég var alveg gríðarlega glaður. Ég var búinn að gera eins mikið og ég gat. Ég var vongóður,“ segir Stefán um lokakvöld keppninnar.

Stefán var 153,1 kíló þegar þátt­ur­inn hófst en er nú 93,7 kíló. Alls missti Stefán því 59,4 kg sem sam­svara næst­um 40% af lík­amsþyngd hans. „Ég hefði bara sennilega lamið hann fyrir að vera ósvífinn,“ segir Stefán og hlær aðspurður hvort að hann hefði trúað því ef að einhver hefði sagt honum fyrir ári síðan að hann ætti eftir að missa heil 60 kíló á næstu mánuðum.

Andlega hliðin verður að vera í lagi

Stefán segir andlegu hliðina spila stórt hlutverk í svona keppni eins og Biggest Loser er. „Þú ferð ekkert út í svona risastórt verkefni nema þú sért með andlegu hliðina í lagi. Þetta er ekki ferli sem þú töltir í gegnum brosandi. Þó að ég sé alltaf brosandi í þáttunum þá náttúrulega rennur mér í skap eins og öllum öðrum,“ segir Stefán sem telur að börn sín hafi kennt sér þolinmæði og þrautseigju í gegnum árin. „Það að hugsa um veiku dóttur mína hefur kennt manni ansi margt,“ segir Stefán sem á þrjú börn á aldrinum 8 til 16 ára.

Þegar í ljós kom að Stefán hafði sigrað keppnina fagnaði hann ákaft með fjölskyldu sinni sem sat úti í sal. „Ég verð að segja alveg eins og er, fyrir lokakeppnina þegar þetta var að bresta á þá var nú konan mín mikið spenntari en ég sýndist mér. Hún var alveg að springa,“ segir Stefán.

Fer heim með fullt fang af verðlaunum

Stefán kveðst ekki hafa verið stressaður fyrir lokakvöldið. „Þetta er eitt það skemmtilegasta sem ég hef á ævi minni gert. Þetta var ógeðslega gaman.“ Stefán hlaut ekki aðeins titilinn Biggest Loser á fimmtudaginn heldur fékk hann einnig glæsilega vinninga að andvirði tveggja milljóna króna. „Okkur vantaði nýtt rúm en ég get ekki sagt að mig hafi vantað sjónvarp sem er á stærð við ágætis bíótjald en ég þigg það,“ segir Stefán og skellir upp úr.

„Að hika er það sama og tapa,“ eru skilaboð Stefáns til allra þeirra sem íhuga nú að sækja um þátttöku í þriðju seríu af Biggest Loser Ísland. „Það er bara þannig. Ef þig langar til að gera þetta þá verður þú að fara með rétta hugarfarið. Ef þú ætlar bara að fara til að hlæja og skemmta þér þá gerist ekki mikið.“

Næsta skref hjá Stefáni er svo að halda áfram að vinna að þeim markmiðum sem hann setti sér í keppninni. „Ég á samt í rauninni ekkert fast kílóatölu-markmið, ég ætla bara að halda áfram í rólegheitunum núna og sjá hvar ég enda, líkaminn stoppar mann af þar sem hann er sáttur.“

Stefán fagnaði með fjölskyldu sinni á fimmtudaginn. Eggert Jóhannesson