„Ég deili öllum viðhorfum sem snúa að frelsi einstaklingsins. Ég gladdist mjög mikið yfir því hvernig slík viðhorf fengu gott svigrúm á fundinum,“ sagði Ólöf Nordal að loknum landsfundi Sjálfstæðisflokksins, þar sem hún var kjörinn varaformaður flokksins.

Nokkra athygli vakti hve mörg mála ungra sjálfstæðismanna fengu hljómgrunn á fundinum og kvað við frjálslyndari tón í ályktunum flokksins en oft áður. Þannig var t.a.m. ályktað um að leyfa ætti staðgöngumæðrun og líknardráp, auk þess um afglæpavæðingu þess að bera á sér fíkniefni til neyslu. Markast það af því að líta skuli á fíkn sem heilsufarsvanda en ekki eitthvað sem taka eigi á í dómskerfinu.

Þá vakti athygli ályktun um að kanna ætti möguleika þess að taka upp annan gjaldmiðil í stað krónu. Þá var ályktað um að lækka ætti skatta og einfalda skattkerfið, að því er fram kemur í umfjöllun um landsfundinn í Morgunblaðinu í dag.