Aðeins tveir af sjö bankaráðsmönnum Landsbankans skrifuðu ekki undir yfirlýsingu sem fimm meðlimir ráðsins sendu frá sér í gær. Það voru þær Helga Björk Eiríksdóttir og Danielle Pamela Neben. Helga segist að hluta til hafa verið ósammála því sem fram kom í yfirlýsingunni og gat því ekki skrifað undir.

„Það eru ýmsar ástæður fyrir því að ég skrifaði ekki undir,“ segir Helga í samtali við mbl en að öðru leyti ætlar hún ekki að tjá sig um málið að svo stöddu.

Bankaráðsmennirnir fimm, þ.e. Tryggvi Páls­son, Eva Sól­ey Guðbjörns­dótt­ir, Jón Sig­urðsson, Kristján Davíðsson og Jó­hann Hjart­ar­son ætla ekki að gefa kost á sér til endurkjörs á aðalfundi Landsbankans þann 14. apríl nk.

Ljóst er því að endurnýjun verður í meirihluta ráðsins eftir fjórar vikur.

Taka ekki þátt í skollaleik

Í fyrrnefndri yfirlýsingu kemur fram að stjórnarformaður Bankasýslunnar, Lár­us L. Blön­dal, hafi boðað Tryggva Pálsson, formann bankaráðs, á fund og tjáð honum að uppsögn Steinþórs Pálssonar, bankastjóra, væri það eina sem myndi duga til þess að leysa Borgunarmálið.

Í yfirlýsingunni segir að þarna hafi Banka­sýsl­an gengið of langt og að þeir muni ekki taka þátt í „skolla­leik sem hvorki sam­rým­ist meg­in­regl­um fé­laga­rétt­ar né góðum stjórn­ar­hátt­um.“ Lýsa þau svo stuðningi við Steinþór.

Helga Björk Eiríksdóttir og Danielle Pamela Neben skrifuðu ekki undir yfirlýsinguna.