„Það virðist vera fallist á sjónarmið ákæruvaldsins í öllum aðalatriðum. Þannig að ég er mjög sáttur með niðurstöðuna.“ Þetta segir Björn Þorvaldsson, saksóknari í markaðsmisnotkunarmáli Kaupþings, eftir að Hæstiréttur kvað upp dóm sinn í málinu í dag.

Allir ákærðu í málinu voru sakfelldir í málinu, en samkvæmt Birni er um stærsta hrunmálið að ræða. „Tvímælalaust stærsta málið,“ sagði Björn í samtali við fjölmiðla í Hæstarétti í dag. Þá væri málið einnig stórt að sniðum vegna fjölda ákærðra í málinu.

Í málinu hafði ákæruvaldið farið fram á að Hæstiréttur myndi horfa til refsihækkunar, en hægt er að bæta helmingi við refsirammann ef um ítrekuð brot er að ræða. Hæstiréttur féllst ekki á það. Aðspurður um þetta atriði sagði Björn ljóst að Hæstiréttur væri að setja ákveðið hámark í hrunmálunum. „Þá útséð að það verði ekki hærri en sex ára refsing fyrir þessi hrunbrot, þá liggur það bara ljóst fyrir,“ sagði hann.

Segir Björn að dómurinn sé tvímælalaust fordæmisgefandi í tengslum við komandi dóma í hrunmálum. „Eftir því sem málunum fjölgar verða fordæmin skýrari. Þetta hefur allt verið að falla á sömu lund. Þetta hjálpar til við að túlka seinni mál.“

Dómarar í Hæstarétti við uppkvaðningu dóms í dag. mbl.is/Golli