Íslendingar hafa verið á eftir þegar kemur að innleiðingu reglugerða varðandi fjármálainnviði og greiðslumiðlun sem taka þarf upp í gegnum EES-samninginn.

Þetta fram kemur í nýrri fréttaskýringu í Morgunblaðinu í dag þar sem vitnað er til nýrrar útgáfu af ritinu Fjármálainnviðum sem Seðlabanki Íslands gefur út.

Augu stjórnvalda víða um heim beinast í auknum mæli að öryggi í net- og upplýsingakerfum og er fjármálaþjónusta þar ekki undanskilin. Ógnin vegna misnotkunar á net- og upplýsingatækni fer ört vaxandi, ásamt því að tækninýjungar og síbreytilegar aðferðir gera rekstraraðilum upplýsingakerfa stöðugt erfiðara að verjast netárásum.

Að sögn Sigríðar Rafnar Pétursdóttir, forstöðumanns hjá Seðlabankanum, var tilgangurinn með umfjöllun Fjármálainnviða um netöryggi að vekja athygli á þessum málum. „Málaflokkurinn hefur snertifleti við margar stjórnsýslustofnanir og verið í deiglunni undanfarið,“ segir Sigríður. „Þegar kemur að net- og upplýsingaöryggi, þá er full ástæða til að vera vakandi og með viðbúnaðinn í lagi.“