Karl og Steingrímur Wernerssynir og Guðmundur Ólason voru í dag dæmdir í Héraðsdómi Reykjavíkur til að greiða þrotabúi Milestone 5,2 milljarða vegna millifærslna sem voru gerðar á reikning Ingunnar Wernersdóttur, systur bræðranna, en með því létu þeir félagið fjármagna kaup sín á hlutafé Ingunnar í Milestone. Áður höfðu þremenningarnir hlotið fangelsisdóm vegna viðskiptanna.

Guðmundur var framkvæmdastjóri Milestone á þessum tíma sem greiðslurnar voru inntar af hendi og færðar í bókhald og var með prókúru fyrir félagið. Bræðurnir voru aftur á móti eigendur þess. Segir í dómnum að þeir hafi því allir samkvæmt stöðum sínum hjá félaginu getað bakað sér bótaábyrgð.

Dómur héraðsdóms í heild sinni

Í dómi héraðsdóms segir að bræðurnir hafi með viðskiptunum ekki leitast við að tryggja hagsmuni félagsins heldur til að afla þeim ótilhlýðilegra hagsmuna á kostnað félagsins.

Steingrímur Wernersson var auk þeirra Karls og Guðmundar einnig dæmdur til að greiða kröfuna. Rósa Braga

„Aðilar máls þessa hafa ekki fært sönnur á að atvik hafi verið önnur en hér er lýst. Í þessu ljósi verður að leggja til grundvallar að Milestone ehf. hafi með framangreindum ráðstöfunum verið látið greiða kaupverð hlutabréfanna samkvæmt samningunum 4. desember 2005, sem hafi við kaupin orðið eign stefndu Karls og Steingríms, án þess að leitast væri við að tryggja þá augljósu hagsmuni félagsins að það fengi fjármunina greidda til baka eða að öðrum kosti eitthvert endurgjald er svaraði kaupverðinu. Breytir engu í því sambandi þó að reynt hafi verið að láta Milestone Import Export Ltd., er laut yfirráðum stefndu Karls og Steingríms, taka á sig skyldu til að greiða Milestone ehf. þessa fjármuni til baka, enda gat krafa Milestone ehf. á hendur því félagi í raun ekki verið neins virði. Þessar ráðstafanir voru bersýnilega til þess fallnar að afla hluthöfum Milestone ehf., stefndu Karli og Steingrími, ótilhlýðilegra hagsmuna á kostnað félagsins, auk þess að fela í sér misnotkun á aðstöðu innan félagsins í viðskiptum með hluti í því og öðrum félögum innan sömu samstæðu,“ segir í dómi héraðsdóms.

Tekið er fyrir það að greiðslurnar hafi verið lán til Ingunnar, heldur hafi verið að efna kaupsamning um hlutabréf Milestone og dótturfélaga þess.

Ingunn var einnig kærð í málinu af þrotabúinu, en héraðsdómur sýknaði hana af öllum kröfum um bótaskyldu.