Þar kemur fram að lög um uppreist æru hafi verið í gildi áratugum saman og þeim hafi verið ætlað að styðja við dæmda einstaklinga við að takast á við lífið að lokinni afplánum. Flestir telji hins vegar lögin út í hött.

Róbert Árni Hreiðarsson (Robert Downey), fyrrverandi lögmaður, var dæmdur í þriggja ára fangelsi árið 2007 fyrir að hafa beitt unglingsstúlkur kynferðislegu ofbeldi. Í september 2016 hlaut hann uppreist æru og í sumar staðfesti Hæstiréttur að hann fengi lögmannsréttindi sín á ný.

Dóttir Bergs Þórs Ingólfssonar er eitt af fórnarlömbum Róberts og ræðir AFP-fréttastofan við hann um málið. 

AFP-fréttastofan hefur þær upplýsingar úr dómsmálaráðuneytinu að undanfarna tvo áratugi hafi 86 dæmdir einstaklingar sótt um uppreist æru. Tveir þriðju þeirra hafi fengið beiðni sína samþykkta.

Einnig er fjallað um mál Atla Guðjóns Helgasonar, fyrrverandi knattspyrnumanns og síðar lögfræðings. Hann var dæmdur 16 ára fangelsi fyrir morðið á viðskiptafélaga sínum árið 2001. Hann fékk síðar uppreist æru. 

Ónafngreindur einstaklingur, sem er einn þeirra sem hefur fengið uppreist æru, segir í samtali við AFP að hann hafi vissar efasemdir um framkvæmdina. „Fyrir mig var þetta algjörlega nauðsynlegt vegna menntunnar minnar og möguleikans á að framfleyta mér. Ég hafði einfaldlega enga aðra möguleika,“ segir hann. „En það er mitt að gera yfirbót fyrir það sem ég gerði.“ „Ég þarf ekki á skjali að halda frá ríkisstjórninni sem kveður á um að ég sé góður og gildur þjóðfélagsþegn. Ég braut lögin og ég tek fulla ábyrgð á því sem ég gerði,“ bætir hann við.

AFP fjallar um mál dæmds barnaníðings sem faðir Bjarna Benediktssonar forsætisráðherra, Benedikt Sveinsson, veitti meðmæli. Þar kemur fram að maðurinn hafi verið dæmdur árið 2004 fyrir að nauðga stjúpdóttur sinni nánast daglega í 12 ár. Leynd hafi hvílt yfir nafni Benedikts og aðeins sonur hans og dómsmálaráðherra hafi verið upplýst, segir AFP-fréttastofan í umfjöllun sinni. Farið er yfir það sem gerðist í kjölfarið og boðað til kosninga sem fram fara á laugardag.

Alþingi greiddi atkvæði um uppreist æru á síðasta degi þingsins, 27. september. Ákvæði um upp­reist æru í hegn­ing­ar­lög­um var fellt úr gildi en til­laga þess efn­is var samþykkt með 55 at­kvæðum. Einn greiddi ekki at­kvæði og sjö voru fjar­ver­andi. 

Arnar Þór Jónsson, lögmaður og fyrrverandi dómari, segir í samtali við AFP-fréttastofuna, að hann sé ekki sáttur við að með því sé komið alfarið í veg fyrir að ákvæðinu sé beitt og umræðan hafi allt of mikið beinst að barnaníðingum.