Nýrri áætlun um meðferð kynferðisbrota verður framfylgt á næsta kjörtímabili og hún jafnframt fjármögnuð að fullu. Með áætluninni er gert ráð fyrir að styrkja innviði réttarvörslukerfisins með það að markmiði að styrkja stöðu brotaþola innan þess og efla og samhæfa þjónustu við brotaþola á landsvísu, ekki síst í heilbrigðiskerfinu. Þetta er meðal þess sem kemur fram stjórnarsáttmála nýrrar ríkisstjórnar, í kaflanum um jafnréttismál og jöfn tækifæri.

Katrín Jakobsdóttir, formaður Vinstri grænna og verðandi forsætisráðherra, tiltók þennan málaflokk sérstaklega þegar farið var yfir helstu atriði stjórnarsáttmálans við undirritun hans á Listasafni Íslands í morgun. Hún sagði margt í kaflanum um jöfn tækifæri eflaust vekja athygli.

Frétt af mbl.is

„Allir Íslendingar njóti góðs af“

í sáttmálanum segir að rýnt verði í lagaumhverfi kynferðisbrota með það að markmiði styrkja stöðu kærenda kynferðisbrota. Istanbúl-samningurinn um forvarnir og baráttu gegn ofbeldi gegn konum og heimilisofbeldi verður einnig fullgiltur

Ríkisstjórnin mun enn fremur standa fyrir gerð áætlunar í samstarfi við sveitarfélögin um að útrýma kynbundnu ofbeldi, ekki síst stafrænu kynferðisofbeldi.

Einstaklingar megi sjálfir ákveða kyn sitt

Í sáttmálanum segir einnig að ríkisstjórnin vilji koma Íslandi í fremstu röð í málefnum hinsegin fólks með metnaðarfullri löggjöf um kynrænt sjálfræði í samræmi við nýútkomin tilmæli Evrópuráðsins vegna mannréttinda intersex-fólks.

Í þeim lögum yrði kveðið á um að einstaklingar megi sjálfir ákveða kyn sitt, kynvitund þeirra njóti viðurkenningar, einstaklingar njóti líkamlegrar friðhelgi og jafnréttis fyrir lögum óháð kynhneigð, kynvitund, kyneinkennum og kyntjáningu.