Katalónska þingið samþykkti í dag að kosið verður um forseta héraðsstjórnarinnar á morgun. Þingmenn sammæltust um að sjálfstæðissinninn Quim Torra verður einn í kjöri.

Joaquim Torra i Pla er 55 ára lögfræðingur og hefur setið á katalónska þinginu frá því í janúar. 

Af 135 þingmönnum styðja 70 sjálfstæði Katalóníu en 65 vilja að héraðið verði áfram hluti af Spáni. Fimm þingmenn sjálfstæðissinnaflokksins CUP, Sameiningarflokks alþýðu, sögðust ætla að greiða fyrrverandi forseta Katalóníuhéraðs, Carles Puigdemont, atkvæði, þrátt fyrir að hann sé ekki í kjöri.

Puig­demont hef­ur verið í sjálf­skipaðri út­legð í Belg­íu frá því í októ­ber í fyrra, skömmu eft­ir at­kvæðagreiðslu Katalón­íu­búa um sjálf­stæði fylk­is­ins, sem spænsk yf­ir­völd segja ólög­lega. Hann var handtekinn í Þýskalandi í mars og hefur dómstóll þar í landi hafnað því að framselja Puigdemont til Spánar.

Frétt af mbl.is

Framselja ekki Puigdemont

Puig­demont hvatti spænsk stjórn­völd í síðasta mánuði til að hefja þegar í stað viðræður um póli­tíska lausn til að binda enda á deil­una sem hef­ur staðið yfir vegna mis­heppnaðra áforma um sjálf­stæða Katalón­íu.

Samkomulag náðist í dag við þá þingmenn sem hugðust kjósa Puigdemont að sitja hjá í forsetakjörinu á morgun.