Enginn þeirra fyrrverandi ráðherra katalónsku héraðsstjórnarinnar sem voru fangelsaðir eða eru í útlegð vegna kröfu þeirra um sjálfstæði frá Spáni eru hluti af nýrri ríkisstjórn héraðsstjórnarinnar sem forsetinn Quim Torra hefur tilnefnt.

Þar með eru taldar auknar líkur á því að spænsk stjórnvöld bindi enda á beina stjórn sína yfir Katalóníu.

Fyrr í mánuðinum viðurkenndu spænsk stjórnvöld Torra sem leiðtoga Katalóníu en neituðu að samþykkja val hans á ráðherrum vegna þess að fjórir þeirra hafa verið ákærðir vegna tengsla við sjálfstæðiskröfu katalónsku héraðsstjórnarinnar í fyrra.

Tveir mannanna eru í varðhaldi og bíða réttarhalda í Madrid. Hinir tveir eru í sjálfskipaðri útlegð í Belgíu.

Í yfirlýsingu sem barst seint í dag kom fram að Torra, sem er aðskilnaðarsinni, hefði undirritað nýja tilskipun með þrettán ráðherra. Þeir fjórir sem voru ákærðir eru ekki á meðal þeirra.