Sá fyrsti sem nauðgaði ellefu ára heyrnarskertri stúlku í fjölbýlishúsi í Chinnai á Indlandi var 66 ára gamall lyftuviðgerðarmaður. Þetta var um miðjan janúar. Stúlkan hafði komið heim úr skólanum og var að hjóla um húsið sem er að mestu tómt. Fleiri tóku svo þátt í ofbeldinu og í heild nauðguðu 24 karlmenn stúlkunni reglulega í fleiri mánuði. Mennirnir tóku upp myndbönd hver af öðrum að nauðga barninu, að því er fréttir indverskra fjölmiðla herma.

Fréttir af málinu hafa vakið gríðarlega hörð viðbrögð á Indlandi en þar er kynferðisofbeldi mjög útbreitt og oft horft fram hjá slíkum brotum. 

Frétt af mbl.is

Nauðguðu 11 ára stúlku ítrekað

Í fjölbýlishúsinu, sem er enn í byggingu, eru 300 íbúðir en fáir eru fluttir þangað inn. Ofbeldismennirnir voru að störfum í húsinu og í hópnum er m.a. pípulagningamaður, rafvirki og öryggisverðir.

Lögreglan segir að stúlkan hafi borið kennsl á alla mennina. Að minnsta kosti fjórir þeirra hafa játað að hafa nauðgað henni og tveir til viðbótar segjast hafa áreitt hana.

Foreldrar stúlkunnar kærðu málið til sérstakrar kvenlögregludeildar á mánudag. Lögreglan hóf þegar aðgerðir sem stóðu í tvo daga. Voru mennirnir handteknir á því tímabili. Stúlkan var flutt á sjúkrahús.

Fyrstu fregnir hermdu að ofbeldismennirnir væru sautján en lögreglan segir nú að þeir séu að minnsta kosti 24. „Rannsóknin hefur leitt okkur að fleiri grunuðum og í heild verða 24 ákærðir fyrir nauðgun,“ hefur Hindustan Times eftir talsmanni lögreglunnar. 

Mennirnir sprautuðu deyfilyfjum í stúlkuna áður en þeir brutu gegn henni í kyndiklefa í kjallara fjölbýlishússins, að sögn lögreglunnar. 

Samkvæmt lögreglunni er stúlkan yngri dóttir hjóna sem nýverið höfðu flutt til Chennai-borgar. Faðir stúlkunnar sagði lögreglu að hún þjáðist af stöðugum magaverkjum og er móðir hennar fór að kanna málið betur komst hún að því að dóttir hennar hafði verið beitt kynferðisofbeldi af hópi karla frá 15. janúar til 5. júlí. Ofbeldismennirnir sögðu stúlkunni að hún myndi hafa verra af ef hún segði frá.