Skiptastjóri var skipaður til að fara með málefni formúluliðsins Force India sem fengið hefur greiðslustöðvun vegna mikilla fjárhagsörðugleik.

Þessi ákvörðun dómstóls í London hefur í för með sér að liðið getur haldið áfram starfsemi meðan verið er að semja um hugsanlegan kaupanda að því.

Ökumaðurinn Sergio Perez stendur á bak við greiðsluþrotsbeiðnina en hann á inni hjá liðinu ógreidd laun upp á fleiri milljónir dollara. Segir hann fjárhagsstöðu liðsins „krítíska“ og hafi það til að mynda ekki efni á að reyna þróa og bæta keppnisbílinn.  

Force India skuldar einnig fjölda birgja fé, svo sem Mercedes fyrir vélar og gírkassa. Mun þýska liðið hafa staðið með Perez í að knýja greiðslustöðvunina fram. 

Undanfarna mánuði hefur Force India þreifað fyrir sér um sölu á liðinu. Hafa ýmsir fjárfestar verið nefndir í því sambandi, þar á meðal kanadíski  auðkýfingurinn Lawrence Stroll, faðir ökumannsins Lance Stroll hjá Williams. Framkvæmdastjóri liðsins, Otmar Szafnauer, segir að tíðinda af sölutilraunum megi vænta bráðlega.