Aðalheiður Borgþórsdóttir hefur verið ráðin bæjarstjóri Seyðisfjarðarkaupstaðar. Meirihluti bæjarstjórnar lagði fram tillögu um ráðningu Aðalheiðar á bæjarstjórnarfundi í gær og var tillagan samþykkt með fjórum atkvæðum fulltrúa L-listans sem hefur meirihluta í sveitarstjórn. Tveir greiddu atkvæði gegn tillögunni og einn sat hjá. 

Eygló Björg Jóhannsdóttir, sveitarstjórnarfulltrúi B-lista, lagði fram tillögu þess efnis að Arnbjörg Sveinsdóttir, fyrrverandi alþingismaður, yrði ráðin í stöðu bæjarstjóra. Tillagan var felld með fjórum atkvæðum meirihlutans gegn þremur atkvæðum minnihlutans. 

Aðalheiður hefur meðal annars unnið fyrir LungA og sinnt markaðsmálum fyrir Seyðisfjarðarhöfn. Hún tekur við stöðu bæjarstjóra af Vilhjálmi Jónssyni.