Aðalsamningamaður Bandaríkjanna vegna viðskiptadeilunnar við Kína segir að 1. mars sé síðustu forvöð til að komast að niðurstöðu um samning sem komið geti í veg fyrir frekara viðskiptastríð milli landanna.

„Hvað mig varðar þá lít ég á 1. mars sem lokadag. Þegar ég tala við forsetann þá talar hann ekki um að semja eftir 1. mars heldur talar hann um að ná samkomulagi ef mögulegt er á næstu 90 dögum,“ sagði Robert Lighthizer aðalviðskiptafulltrúi í samtali við fréttastöðina CBS í dag.

Frétt af mbl.is

Vopnahlé í tollastríði

Þá sagði hann að handtaka Meng Wanzhou, fjármálastjóra Huawei og dóttur stofnanda raftækjaframleiðandans, í Kanada í byrjun desember muni ekki hafa áhrif á samningaviðræðurnar. „Það er opinbert mál og tengist ekki því sem ég er að gera,“ bætti hann við.

Kín­versk stjórn­völd hafa kraf­ist þess að hún verði lát­in laus og segja hand­töku henn­ar vera brot á mann­rétt­ind­um. Ekki hef­ur verið greint frá ástæðum hand­tök­unn­ar og í yf­ir­lýs­ingu frá Huawei seg­ir að fyr­ir­tæk­inu sé „ekki kunn­ugt um að Meng hafi brotið af sér“. Því hefur verið haldið fram að handtaka hennar tengist rannsókn bandarískra yfirvalda á meintum brotum Huawei á viðskiptabanni gegn Íran.

Frétt af mbl.is

Upplýsi um ástæður handtökunnar

Handtakan hefur orðið til þess að fjárfestar hafa frekar haldið að sér höndum og staðan á fjármálamörkuðum ber þess merki. Hún þykir koma á gríðarlega slæmum tíma þar sem einungis sólarhringur var liðinn frá því að Donald Trump tilkynnti að hann og forseti Kína, Xi Jinping, hefðu fallist á að veita samninganefndum 90 daga til að leysa úr viðskiptadeilunni.