Þegar breski auðkýfingurinn og ævintýramaðurinn Sir Richard Branson var á unga aldri dreymdi hann um að setja á laggirnar fyrirtæki sem sérhæfði sig í skemmtiferðasiglingum án þess þó að hafa nokkurn tímann stigið fæti á slíkt skip. Nú hefur hann gert gott betur því fyrir nokkrum árum stofnaði hann fyrirtækið Virgin Voyages og lét smíða fyrir sig skemmtiferðarskipið Scarlet Lady en það verður sjósett í Miami árið 2020. Skipið mun geta flutt hátt í 3.000 farþega og er einungis hugsað fyrir fullorðna. Um borð verða 20 veitingastaðir, snyrtistofur, líkamsræktarstöðvar og mikið af afþreyingu.

Notalegar svalir að hætti Tom Dixon. mbl.is/VV

Nýlega litu í dagsins ljós tölvuteiknaðar myndir af þeim 78 svítum sem hannaðar eru af Tom Dixon. Svíturnar bera allar skemmtileg nöfn eins og Posh, Massive og Gorgeous og er stærsta svítan rúmlega 200 fermetrar. Það verður gaman að sjá þenna langþráða draum Richards Branson rætast og líklega margir þarna úti sem bíða álíka spenntir eftir þessum nýja ferðakosti.

Sir Richard Branson er þekktur fyrir að láta drauma sína rætast. Mbl/VirginVoyages