„Mér gekk illa að koma mér almennilega af stað aftur en ég náði að rífa mig í gang þegar ég byrjaði að hlaupa með Náttúruhlaupum árið 2017. Félagsskapurinn þar er svo skemmtilegur og gefandi að það er lítið mál að koma sér í hlaupagírinn.“ Mikil aukning hefur verið í vinsældum utanvegahlaupa á síðustu misserum og segir Helga María að það sé hreinlega svo gaman. „Ég trúi því að náttúran geri okkur öll að betri manneskjum og félagskapurinn skemmir ekki fyrir.“

Ævintýraferð á dagskrá með dótturinni

„Ég hef eiginlega aldrei getað hlaupið á malbiki og er með einhverja innbyggða bremsu þegar kemur að því að hlaupa á götunni,“ segir Helga María og segir aðalástæðuna líklega vera sinn bakgrunn úr fjallamennskunni. „Ég hef verið á fjöllum í rúman áratug og er mikill aðdáandi náttúrunnar. Mér líður best þegar ég er ekki umkringd steypu.

Aðspurð hvort hún hafi náð að plata fjölskylduna með sér út að hlaupa segir Helga María 15 ára dóttur sína vera ansi liðtæka. „Hún hefur komið með mér í fjallgöngur frá því hún byrjaði að ganga. Hún dýrkar að vera á fjöllum og ég held að það sé bara stutt í að hún fari að elska utanvegahlaupin líka,“ segir hún og bætir við að í júní ætli þær mæðgur í mikla ævintýraferð til Slóveníu þar sem þær stefna meðal annars á að klifra upp á Mt. Triglav, hæsta tind landsins.

Helga María ásamt Rúnu, vinkonu sinni og samstarfskonu. Ljósmynd/Aðsend

Eitt hlaup á hverri árstíð

Heilmikið er um að vera hjá Helgu Maríu á næstunni en hún vinnur bæði sem leiðsögukona hjá Íslenskum fjallaleiðsögumönnum og Náttúruhlaupum. Í maí fer hún út til Ítalíu, nánar tiltekið til eyjarinnar Elbu, með hóp frá Náttúruhlaupum en þar tekur hópurinn þátt í Elba Trail Run-keppninni. „Ég stefni líka á Laugaveginn og hlakka mikið til að hlaupa þar með stórum hópi frá Náttúruhlaupum.“

Helga María og Rúna Rut, vinkona hennar, settu nýlega upp utanvegahlauparöðina Árstíðahlaup en þar skipuleggja þær eitt hlaup á hverri árstíð. „Aðalmarkmiðið okkar er að hvetja fólk til að hlaupa allt árið og njóta þess sem hver árstíð hefur upp á að bjóða. Við hlupum síðast á vorjafndægri og því er Sumarsólstöðuhlaupið okkar næst á dagskrá, þann 21 júni.“ Hægt er að fá nánari upplýsingar um hlaupið hér.