Skammhlaup er nú talin líklegasta skýringin á að eldur kom upp í Notre-Dame dómkirkjunni í París á mánudag. Sky-sjónvarpsstöðin greinir frá þessu og hefur eftir rannsakendum að af öryggisástæðum hafi þeir hafi ekki enn fengið „grænt ljós“ á vinnu í dómkirkjunni. Enn sé unnið að því að styrkja suma hluta burðarvirkis kirkjunnar með viðarplönkum.

Verulega miklar skemmdir urðu á þessari 850 ára gömlu kirkju þegar eldur kom upp í henni á mánudag. Sagði Laurent Nuñez, aðstoðar innanríkisráðherra Frakklands, að ekki hefði munað nema 15-30 mínútum að ekki tækist að bjarga kirkjunni. Þá er villa í hugbúnaði talin hafa orðið til þess að öryggisverðir fóru á rangan stað í dómkirkjunni þegar tölvukerfi hennar varaði fyrst við eldi í byggingunni. Segja franskir fjölmiðlar dýrmætar mínútur þar hafa þar með farið í súginn.

Slökkvilið Parísar hefur varað við því að byggingin sé í mjög viðkvæmu ásigkomulagi og verulega hættulegt fyrir fólk að vera þar að störfum.

Lögregla hefur þá lokað af stórum hlutum Ile de la Cité, eyjunnar sem Notre-Dame stendur og segir ástæðuna hættu á hruni úr byggingunni.

Frakkar hafa í allan dag lofsungið slökkviliðsmennina 400 sem tóku þátt í að bjarga Notre Dame frá gjöreyðileggingu og sagði Emmanuel Macron Frakklandsforseti þá munu fá orðu fyrir „hugrekki sitt og staðfestu.“

Upphaflega var talið að eldurinn hefði kviknað í kjölfar lagfæringa á kirkjunni, en rannsakendur gátu síðar staðfest að enginn hefði verið á þeim á stað er eldurinn kviknaði.

Embætti saksóknara í París vinnur nú á rannsókn á eldsupptökunum og er talið  að um óhapp hafi verið að ræða. Hefur starfsfólk saksóknara nú þegar rætt við 40 manns sem ýmist störfuðu fyrir Notre Dame kirkjuna eða byggingaverktakana sem unnu að lagfæringunum.