Hann hefur náð að nýta fjallaskíðatímabilið til hins ýtrasta en meðfram lögmannsstörfum er hann fararstjóri hjá Ferðafélagi Íslands og hefur meðal annars haldið utan um fjallaskíðaprógram félagsins í samstarfi við Tómas Guðbjartsson. Hann ætlar að byrja sumarið á því að fara með tveimur vinum sínum til Toskana á Ítalíu og hjóla góðan hring um svæðið. „Þetta verða fjórir hjóladagar þar sem við hjólum um 100 km á dag í þessu fallegasta héraði Ítalíu. Í lok júní fer ég svo sem leiðsögumaður í ferð fyrir FÍ á Hornstrandir. Þá er ferðinni heitið í Reykjarfjörð þar sem við dveljum í þrjá daga og göngum á helstu tinda á svæðinu.  Slökum svo á í lauginni og spilum og syngjum á kvöldin,“ segir Helgi.

Helgi heldur utan um fjallaskíðaprógramm Ferðafélags Íslands ásamt Tómasi Guðbjartssyni. Ljósmynd/Aðsend

Um miðjan júlí er förinni svo heitið í Lónsöræfi með fjölskyldu og vinum. „Þá leigjum við Múlaskála í þrjár nætur og njótum þeirrar gríðarlegu fegurðar sem þar er að finna. Eftir Lónsöræfi er planið að fara með tjaldvagninn um Austurland og enda með því að keppa í Urriðavatnssundinu og smella sér svo á Bræðsluna í lokin.“

Í lok sumars er stefnan svo tekin á nokkurra daga fjallgönguferð í Dolomítunum. „Þetta er ferð með Landkönnuðum FÍ sem er hópur fyrir útskrifaða FÍ Landvætti þar sem hópurinn tekst á við margs konar áskoranir og útvíkkar þægindarramma þátttakenda, þetta verður alvöru prógramm. Þetta er nú það helsta sem er á áætluninni hjá mér núna. Mér finnst gott að plana margt og fjölbreytt. Auðvitað getur vinna og annað sett strik í reikninginn og þá breytist ef til vill eitthvað eða hliðrast til.“