Íslenska hljómsveitin Hjaltlín mun koma fram á Iceland Airwaves í nóvember næstkomandi, en hún hefur ekki komið fram á hátíðinni í fimm ár. Yfir 50 atriði bættust við dagskrá tónlistarhátíðarinnar í dag en hún fer fram dagana 6.-9. nóvember næstkomandi.

Daði Freyr, Jói P og Króli, Cell7, Krabba Mane, GKR og Pétur Ben eru meðal þeirra íslensku atriða sem kynnt voru í dag. Indónesíska dúóið Stars and Rabbit og palestínski tónlistarmaðurinn Bushar Murad sem gaf út lag með Hatara munu einnig koma fram á hátíðinni ásamt Cautious Clay og Orville Peck.

Yfir 130 atriði frá 20 löndum koma fram á hátíðinni og er kynjahlutfallið jafnt annað árið í röð. Iceland Airwaves er einn stofnmeðlima Keychange-verkefnisins, en verkefnið er hannað til að auka sýnileika kventónlistarmanna í Evrópu og hófst árið 2017. Einn hluti verkefnisins er að tónlistarhátíðir heita því að ná jöfnu kynjahlutfalli fyrir árið 2022, en Iceland Airwaves var fyrst hátíða til að ná takmarkinu í fyrra.

„Við stóðum frammi fyrir algjöru lúxusvandamáli í ár eins og önnur ár, þar sem mjög breiður hópur fólks sækist eftir því að spila á hátíðinni,“ segir Anna Ásthildur Thorsteinsson, markaðsstjóri Iceland Airwaves og meðlimur í Keychange. „Það sem skiptir okkur öllu máli eru góðir listamenn og frábær sviðsframkoma. Það er mikið framboð af hæfileikaríku fólki bæði hér á Íslandi og erlendis og að ná jöfnum kynjahlutföllum var auðvelt mál,“ segir Anna Ásthildur.

Atriðin sem kynnt eru í dag slást í hópinn með böndum á borð við Of Monsters and Men, Mac DeMarco, Whitney, Shame, Vök, Hatara, Mammút, Orville Peck og John Grant.

Ljósmynd/Aðsend