Rýma þurfti jólamarkað í miðborg Berlínar í gærkvöldi eftir að lögregla fékk tilkynningu um grunsamlegar mannaferðir á svæðinu. Auk þess var hætt við tónleika í kirkju við torgið vegna hættu sem talin var hafa skapast.

Um er að ræða sama torg og hryðjuverkamaður gerði mannskæða árás á fyrir þremur árum þegar 12 voru myrt­ir og 56 særðust.

Samkvæmt þýskum fjölmiðlum yfirgaf fólk jólamarkaðinn í rólegheitum.

Lögregla greindi síðan frá því að grunsemdirnar væru ekki á rökum reistar en talið var að hegðun tveggja manna væri grunsamleg. 

Enginn var handtekinn en lögregla greindi frá því að annar hinna grunsamlegu manna héti svipuðu nafni og eftirlýstur maður.