Áhrifavaldurinn Manuela Ósk Harðardóttir, í samstarfi við Fitness Sport, býður hverjum þeim sem kýs hana og dansfélaga hennar í þáttunum Allir geta dansað upp á 15% afslátt í verslun Fitness sport. 

Þeir sem vilja freista þess að fá afsláttinn, sem gildir í viku, þurfa að sýna skjáskot til sönnunar þess að þeir hafi kosið Manuelu.

Manuela tilkynnti um tilboðið í „Story“ á Instagram í dag. Manuela er með rúmlega 53 þúsund fylgjendur á samfélagsmiðlinum þar sem hún auglýsir hinar ýmsu vörur í samstarfi við fyrirtæki. 

Manuela keppir í Allir geta dansað með dansaranum Jóni Eyþóri Gottskálkssyni. Keppnin fer þannig fram að dómarar gefa pörunum einkunn og svo kjósa áhorfendur það par sem þeir telja að hafi staðið sig best. Símakosningin skiptir miklu máli og getur ráðið örlögum keppenda. Eitt par er sent heim í lok hvers þáttar.

Hér má sjá færslu Manuelu á Instagram.