Hildur Sólveig Ragnarsdóttir ljósmóðir svarar spurningum lesenda mbl.is um allt sem tengist meðgöngu og fæðingu. Hér svarar hún spurningu um hvernig skoðun á meðgöngu er háttað. 

Góðan dag. Mig langar að spyrja hvort það sé eðlilegt að það er ekki hlustað á hjartaslátt í 10 vikna skoðun hjá ljósmóður?

Sæl og takk fyrir fyrirspurnina.

Það er alveg eðlilegt að ekki sé hlustað eftir fósturhjartslætti í 10 vikna skoðun hjá ljósmóður. Ekki er mælt með að hlusta á fósturhjartslátt á fyrsta þriðjungi meðgöngunnar. Ástæða þess er sú, að það tæki sem er notað og heitir dotpón, gefur frá sér bylgjur sem kallast doppler-bylgjur. Ef hlustað er oft og lengi með doptón getur það aukið líkur á mögulegum skaða fyrir fóstrið. Bylgjurnar geta valdið skaða á vefjum og þá sérstaklega augn- og beinvefjum. Á síðustu árum hefur notkun á þessum tækjum aukist bæði af fagfólki og einnig meðal foreldra. Það er því nauðsynlegt að hafa það í huga þegar foreldrar eru að festa kaup á þessum tækjum og nota án læknisfræðilegrar ástæðu að tækin geta valdið skaða. Einnig getur það verið snúið að finna hjartsláttinn og getur það valdið verðandi foreldrum óþarfa áhyggjum. 

Gangi þér vel.

Hildur Sólveig Ragnarsdóttir

Þú get­ur sent ljós­mæðrun­um spurn­ingu HÉR.

Hildur Sólveig Ragnarsdóttir ljósmóðir. mbl.is/Kristinn Magnússon