Albert Eiríks er manna fremstur í að færa okkur uppskriftir héðan og þaðan sem vakið hafa eftirtekt og lukku. Þessi uppskrift hér er þar engin undantekning og raunar má færa sannfærandi rök fyrir því að þetta sé ein snjallasta brauðtertuuppskrift sem sést hefur.

„Á bænum Síreksstöðum í Vopnafirði búa rausnarbúi Sölvi Kristinn Jónsson og Karen Hlín Halldórsdóttir. Auk þess að reka sauðfjárbú eru þau með fyrirmyndarferðaþjónustu og bjóða upp á gistingu og veitingar. Þau leitast við að hafa hráefnið ekki bara úr héraði, heldur mest af bænum. Það fyrsta sem Sölva bónda datt í hug þegar ég nefndi við hann að útbúa sitt uppáhald fyrir bloggið var brauðterta, gamaldags sívinsæl góð íslensk skonsubrauðterta með hangikjötssalati og sardínum,“ segir Albert um heimsókn sína á Síreksstaði.

Sölvi Kristinn með hangikjötsbrauðtertuna girnilegu. Á brauðtertunni (og í salatinu) eru egg úr öndunum á bænum og hangikjötið er reykt á Síreksstöðum. Ljósmynd/Albert Eiríksson