Útflutningsverðmæti sjávarafurða nam 23,7 milljörðum króna í maí og var því 16% minna en í sama mánuði í fyrra samkvæmt bráðabirgðatölum Hagstofu Íslands, að því er fram kemur á Radarnum, mælaborði sjávarútvegsins. Þar segir að samdrátturinn sé mun meiri í erlendri mynt, eða um 26%. En gengi krónunnar um 12% veikara í maí en í sama mánuði í fyrra.

„Þó ber að hafa í huga að í maí í fyrra var útflutningur á uppsjávarafurðum óvenjumikill miðað við árstíma, aðallega á makríl. Makríll er að mestu veiddur síðla sumars og fram á haust og kann því að vera að töf hafi verið á afhendingu á gögnum og hann færður til bókar með útflutningi í maí. Því gæti samdráttur í útflutningi í maí á milli ára verið minni fyrir vikið, þó er erfitt að staðfesta slíkt.“

Átta milljarða samdráttur

Fram kemur að útflutningsverðmæti sjávarafurða á fyrstu fimm mánuðum ársins nam 104,7 milljörðum króna, en var 112,5 milljarðar á sama tímabili 2019. „Það er um 7% samdráttur í krónum talið en um 14% í erlendri mynt. Þetta rímar ágætlega við vikulegu tölurnar sem Hagstofan hefur birt um vöruskipti að undanförnu.“

Er talið að framtak Hagstofunnar að birta tölur vikulega hafi reynst „afar gagnlegt, sér í lagi á þessum óvissutímum sem nú eru uppi.“