Framkvæmdastjórn Evrópusambandsins mælir með því að sambandsríkin 27 opni að fullu landamæri sín gagnvart hvert öðru frá og með 15. júní.

Þetta var tilkynnt á blaðamannafundi í dag. Áform eru uppi um að ytri landamæri sambandsins verði síðan opnuð rólega í framhaldinu, og þá aðeins fyrir löndum þar sem talið er að náðst hafi stjórn á faraldri kórónuveirunnar.

„Alþjóðleg ferðalög eru lykilatriði fyrir ferðaiðnað og viðskipti, og fyrir fjölskyldur og vini til að ná aftur saman,“ sagði framkvæmdastjóri innanríkismála ESB, Ylva Johansson, á fundinum.

„Þótt við þurfum öll að gæta áfram varúar er kominn tími til að undirbúa af alvöru afléttingu á ferðatakmörkunum til og frá löndum þar sem ástand heilbrigðismála er svipað því sem ríkir innan Evrópusambandsins,“ bætti hún við.

Að minnsta kosti 416 þúsund látnir

Í Bandaríkjunum, þar sem flestir hafa hvort tveggja sýkst og látist af völdum veirunnar, fór fjöldi skráðra tilfella yfir tvær milljónir í dag.

Á sama tíma skreið fjöldi tilfella í Rússlandi yfir 500 þúsund.

Alls hefur veiran dregið að minnsta kosti 416 þúsund manns til dauða frá því hún tók að breiðast út um heiminn í desember, samkvæmt talningu AFP-fréttastofunnar. Samtals hafa fleiri en 7,3 milljónir tilfella verið skráðar.

Mesti samdráttur á þessari öld

Faraldurinn hefur komið illa við efnahag flestra ríkja heimsins, enda hafa honum fylgt ýmiss konar takmarkanir á ferðum og samkomum manna.

Efnahags- og framfarastofnunin OECD greindi í dag frá því að á fyrstu þremur mánuðum ársins hefði efnahagur G20-ríkjanna dregist saman um 3,4%.

Samdrátturinn er sá mesti frá því hafist var handa við að skrá þessar upplýsingar árið 1998. Mestur var hann í Kína, þar sem efnahagurinn dróst saman um heil 9,8%.

Frétt af mbl.is

44,2 milljónir hafa sótt um bætur