Fleiri en 10 ríkisborgarar Hong Kong, þar á meðal aðgerðasinni sem hefur verið kærður á grundvelli nýrra og umdeildra öryggislaga í Hong Kong, voru handteknir af þarlendri landhelgisgæslu þar sem þeir reyndu að flýja til Taívans.

Landhelgisgæslan sendi frá sér tilkynningu í gær þar sem sagt er að á sunnudagsmorgun klukkan níu hafi yfirvöld í Guangdong-fylki, sem liggur við landamæri Hong Kong, rakið ferðir báts sem væri grunaður um að fara ólöglega yfir landamæri. Í tilkynningunni voru fleiri en 10 sagðir hafa verið handteknir, þar á meðal tveir grunaðir sem bera eiginnöfnin Li og Tang.

Andy Li sagður á meðal hinna handteknu 

Fréttamiðlar í Hong Kong hafa greint frá því að 12 ungar manneskjur hafi verið á bátnum og ætlað sér til Taívans. Til að komast þangað hafi þau þurft að sigla 600 kílómetra langa leið. Fjöldi lýðræðissinna hefur lagt leið sína þangað í kjölfar þess að öryggislögin voru sett á. Aðgerðasinninn Andy Li er sagður á meðal hinna handteknu. 

Í gær sagði Chris Tang, lögreglustjóri Hong Kong, fréttamönnum að hann hefði heyrt af handtökunum en lögreglan hefði engar frekari upplýsingar um þær. 

Li hefur unnið að því að vekja athygli heimsins á stöðunni í Hong Kong með herferðum og með því að bjóða erlendum aðilum að fylgjast með framgöngu kosninga í Hong Kong í staðbundnum kosningum á síðasta ári. Li var áður ákærður fyrir að hafa brotið öryggislögin en var sleppt gegn tryggingu. 

Nú þegar hefur öryggislögregla Hong Kong handtekið 25 manns vegna nýju laganna sem tóku gildi í lok júlí.