Hin mjög svo forvitnilega heimildarmynd Dick Johnson is Dead, eða Dick Johnson er dáinn,  er tekin til kostanna í nýjasta þætti hlaðvarpsins BÍÓ. Gunnar Ragnarsson, nýr kvikmyndarýnir á Morgunblaðinu, skrifar dóm sem lesa má í blaðinu i dag og ræðir við umsjónarmenn hlaðvarpsins. Voru allir þrír hrifnir af umræddri Netflix-mynd. 

Í myndinni segir af Richard Johnson, föður kvikmyndagerðarkonunnar Kirsten Johnson og höfundar myndarinnar, sem hefur starfað sem geðlæknir en er nú að láta af störfum. Hann þjáist af heilabilun og er fylgst með því hvernig honum hrakar eftir því sem tíminn líður. Kirsten fær föður sinn til að taka þátt í því að sviðsetja dauða sinn með ýmsum hætti og festa á filmu með mjög svo galgopalegum hætti. Gunnar gagnrýnir myndina í Morgunblaðinu í dag og hlusta má á hlaðvarpið hér fyrir neðan. Vara ber hlustendur við því að ýmsu er ljóstrað upp um myndina.