Lækkun verðvísitölu í erlendri mynt hefur ekki verið meiri en í áratug eða frá árslokum 2009. Var hún 7,5% minni í október þessa árs en í sama mánuði í fyrra, að því er fram kemur í greiningu sem birt hefur verið á Radarnum. Þar segir jafnframt að verð á sjávarafurðum lækkaði um rúm 1,4% í erlendri mynt í október frá því í september.

Þá segir að tölurnar gefi til kynna verulegan viðsnúning frá þeirri þróun sem var vel á veg fyrir tilkomu kórónuveirufaraldursins. „Verðlækkanir hafa jafnframt heldur verið að færast í aukana eftir því sem liðið hefur á árið, enda hefur faraldurinn farið aftur á flug og sóttvarnaraðgerðir samhliða því,“ segir í greiningunni.

Skjáskot/Radarinn

Hins vegar er bent á að þróun afurðaverðs sé talsvert mismunandi eftir einstaka afurðaflokkum og tegundum og er meðal annars vísað til þróun verðvísitölu botnfiskafurða frá ársbyrjun 2019. Þar sést að í október höfðu ferskar botnfiskafurðir lækkað minnst í verði en skreið mest.

Þá segir að „í heild hafa botnfiskaafurðir þó lækkað talsvert minna í verði en aðrir tegundahópar miðað við verðvísitölur Hagstofunnar. Þannig hafði verð á botnfiskaafurðum lækkað um tæp 5% á milli ára í október á sama tíma og verð á skelfiski hefur lækkað um rúm 13% og á uppsjávarafurðum um 17%.“

Talið er að þessar tölur styðji við þá ályktun að samdráttur í útflutningsverðmætum sem átti sér stað í október hafi verið drifinn af afurðaverði. „Það mun koma betur í ljós þegar Hagstofan birtir tölur um vöruviðskipti fyrir janúar til október, en þá mun liggja fyrir sundurliðun á því hvernig útflutningsverðmæti sjávarafurða í október skiptist niður og hvert útflutt magn var.“ Hagstofan hefur tilkynnt um að birting þeirra gagna verði flýtt.

Skjáskot/Radarinn