Aldrei áður hafa lyfjatengd andlát verið jafn mörg í Skotlandi og á síðasta ári. Alls voru þau 1.264 talsins. Til samanburðar voru þau 30 talsins á Íslandi í fyrra.

Skotland hefur ítrekað verið það land sem er með mesta misnotkun lyfja og fíkniefna í Evrópu. Fjölgun andláta á milli ára er 6%. Þrátt fyrir að hafa aldrei verið fleiri þá hefur hægt á vextinum því á árinu 2018 fjölgaði lyfjatengdum andlátum um 27% í Skotlandi. 

Á Íslandi fækkaði aftur á móti lyfjatengdum andlátum á milli ára. Árið 2018 voru þau 39 en eins og áður sagði voru þau 30 í fyrra. Nú brá svo við að hlutfall kynja er jafnt á Íslandi en yfirleitt hafa fleiri karlar en konur látist af völdum lyfja. 11 þeirra sem létust á Íslandi voru á aldrinum 15-29 og jafn margir voru á aldrinum 45-59 ára. Níu einstaklingar á aldrinum 30-44 ára létust af völdum lyfja í fyrra og 8 einstaklingar yfir sextugt.

Skosk stjórnvöld segja að neyðarástand ríki í þessum málaflokki enda dauðsföllin þrefalt fleiri í Skotlandi heldur en í Bretlandi sem heild. 

Hvergi í Evrópu er lyfjanotkun jafn mikil og í Skotlandi en Svíþjóð er í öðru sæti listans. 

Í fyrra fjölgaði dauðsföllum þar sem viðkomandi hafði neytt morfíns og heróíns. 645 dauðsföll eru tengd þessum tveimur efnum í fyrra. Benzodíazepín-lyf eru einnig mjög algeng en krufning hefur leitt í ljós að þeir látnu höfðu í langflestum tilvikum tekið þannig lyf. Um er að ræða róandi lyf. Eins að í 94% lyfjatengdra dauðsfalla hafði viðkomandi tekið fleiri en eina tegund lyfja.