Alsírskur dómstóll hefur dæmt mann til dauða fyrir að hafa tekið franska fjallgöngumanninn Hervé Gourdel af lífi árið 2014. 

Gourdel, 55 ára, var rænt þegar hann var á göngu um Djurdura-þjóðgarðinn í Alsír. Grófu myndbandi af afhöfðun Gourdel var dreift á netinu af hryðjuverkasamtökunum Jund al-Khalifa sem lýstu síðan yfir ábyrgð á aftökunni, en samtökin eru tengd Ríki íslams. 

Einn sakborninganna í málinu, Abdelmalek Hamzaoui, kom fyrir dóm á fimmtudag, en réttað var yfir öðrum að þeim fjarstöddum. 

Hamzaoui lýsti sig saklausan í málinu og sagði að hann hafi einungis verið sakaður um morðið svo hægt væri að loka málinu. Nokkrir samferðamanna Gourdel, sem einnig voru gíslar Jund al-Khalifa-samtakanna, báru kennsl á Hamzaoui sem einn af mannræningjunum. Þrátt fyrir dauðadóm yfir Hamzaoui hefur öllum aftökum verið frestað í Alsír frá árinu 1993. 

Frétt af mbl.is

Hollande boðar til neyðarfundar

Gourdel var tekinn af lífi, líklegast í september 2014, eftir að frönsk yfirvöld neituðu að verða við kröfum hryðjuverkasamtakanna um að hætta árásum á Ríki íslams í Írak. Franço­is Hollande, þáverandi forseti Frakklands, fordæmdi árásina á sínum tíma og sagði hana bæði grimma og til marks um hugleysi. 

Lík Gourdel fannst ekki fyrr en í janúar 2015 í kjölfar þess að alsírsk yfirvöld ráðstöfuðu þúsundum hermanna í leitina. 

Frétt BBC.