Þýska þjóðin virðist vera dolfallin yfir fyrrverandi fótboltakappanum Rúrik Gíslasyni sem nú gerir gott mót í þýska raunveruleikaþættinum Let's Dance. Rúrik hefur slegið í gegn í keppninni undanfarnar vikur og það sést vel í athugasemdakerfinu á Instagram. 

Frétt af mbl.is

Rúrik skráir sig í sögubækur Let's Dance

„Hinn nýi Brad Pitt,“ skrifaði einn undir nýjustu myndina af Rúrik á Instagram. „Það er gaman að horfa á fallegt fólk. Og þegar það getur dansað,“ skrifaði annar. Þá eru nokkrar athugasemdir um að þarna sé á ferðinni kynþokkafyllsti maður. 

Aðrir létu nægja að tjá ást sína á Rúrik með lyndistáknum og eru hjörtu, slefandi karlar og eldur mest áberandi. 

Þetta er ekki í fyrsta skipti sem heil erlend þjóð virðist vera dolfallin yfir Rúrik en hann sló eftirminnilega í gegn hjá brasilísku þjóðinni eftir HM í Rússlandi árið 2018. Þá hrúguðust inn athugasemdirnar á portúgölsku og fylgjendafjöldinn á Instagram fór yfir 1 milljón. Að lokum fann Rúrik svo ástina í örmum brasilísku fyrirsætunnar Nathalie Soliani.

Soliani virðist líka vera ánægð með frammistöðu síns manns í Let's Dance en hún skrifaði orðin „I'm too sexy for my shirt, too sexy for my shirt,“ undir nýjustu mynd Rúrik. 

Frétt af mbl.is

Missir fylgjendur út af Soliani