Það er mjög almenn sátt um Boga Ágústsson hjá litlum krökkum og fyrir því hefur þessi ástsæli fréttamaður okkar fundið. Í nýjasta þætti af Með Loga kveðst hann hins vegar vera meðvitaður um að hann sé að sama skapi umdeildur enda sé það óhjákvæmilegt þar sem hann er oftar en flestir „inni í stofu“ hjá meirihluta landsmanna.

„Auðvitað er eitthvert fólk þarna úti sem segir: Andskotinn, þetta helvíti eina ferðina enn!“ segir Bogi. 

Hann finnur þó almennt fyrir velvilja hjá fólki og segist enda ekki vera í þeirri stöðu að stuða menn mjög harkalega og að núna sé honum ekki skipað á neinn ákveðinn pólitískan bás. 

Þátturinn, sem framleiddur er af Skot Productions, kemur í Sjónvarp Símans Premium á skírdag og verður í opinni dagskrá að kvöldi þess dags kl. 20:15.