Mikið hefur verið rætt og ritað um Promising Young Woman, fyrstu kvikmynd ensku leikkonunnar, handritshöfundarins og nú leikstjórans Emereld Fennell sem hlaut Óskarsverðlaun á sunnudaginn var fyrir handrit myndarinnar. Bæði er það vegna eftirminnilegrar frammistöðu aðalleikkonunnar, Carey Mulligan og umhugsunarverðs umfjöllunarefnis sem vonandi vekur karlmenn til vitundar um hvað má og hvað ekki þegar kemur að nánum samskiptum við konur.

Rætt er við Sigríði Pétursdóttur kvikmyndafræðing um myndina í kvikmyndahlaðvarpinu Bíó en myndin hlaut lofsamlegan dóm í Morgunblaðinu og fjórar stjörnur fimmtudaginn 29. apríl. Sigríður er afar hrifin af myndinni, líkt og gagnrýnandi sem skrifar m.a. að kvikmyndin sé engan veginn dæmigerður hefndartryllir þó hefnd og reiði séu vissulega drifkraftar sögunnar.