Maí hefur löngum verið minn uppáhaldsmánuður. Vorboðinn mikli, sólardagar, próflok, von, allt verður grænna með degi hverjum og þar fram eftir götum.

Nú í maí fáum við einnig að tengjast íslensku menningarlífi náið þar sem borgarhátíðin HönnunarMars fer fram í maí. Ýmsir list- og menningarviðburðir eru fram undan til að gleðja okkur, örva sköpunargleðina, minna okkur á ýmsar víddir lífsins og einfaldlega njóta.

Útskriftarsýningar nema við Listaháskólann eru einnig á döfinni nú í maí og því ætti engum menningarunnanda að leiðast og þeir sem hafa áhuga á að sjá og upplifa eitthvað nýtt og kynnast nýjum hliðum íslensks menningarlífs hafa nú mörg tækifæri til þess.

Ég rakst á mjög fallegan texta á heimasíðu HönnunarMars sem mig langaði til að deila, ásamt því að hvetja ykkur til að hafa augun opin á komandi vikum, upplifa eitthvað nýtt og leyfa sér að sjá en ekki bara horfa.

„HönnunarMars er boðberi bjartsýni og skapandi krafta í samfélaginu. Þar gefst tækifæri til að beina sjónum að hönnun sem drifkrafti til nýsköpunar og sýna hversu mikilvægu hlutverki þessar greinar gegna í samfélaginu.“

Áfram bjartsýni og skapandi kraftar! Hægt er að nálgast dagskrána inni á www.honnunarmars.is og ég óska ykkur dásamlegs dags í sólinni.