„Ég er alveg sannfærður um það að þessi aðferðafræði sem notuð er til mælingar á fiskistofnum hún stenst ekki,“ segir Arthur Bogason, formaður Landssambands smábátaeigenda, í samtali við 200 mílur. Hann kveðst svekktur yfir ákvörðun Kristjáns Þórs Júlíussonar, sjávarútvegs- og landbúnaðarráðherra, um að fylgja ráðgjöf Hafrannsóknastofnunar er varðar heildaraflamark fiskveiðiársins 2021/2022.

Frétt af mbl.is

Kristján fylgir ráðgjöf Hafrannsóknastofnunar

„Þetta veldur mér miklum vonbrigðum. […] Það getur vel verið að menn séu að verða varir við einhvern samdrátt í þorski en að hann sé einhver 20% eins og Hafró er að tala um; það bara kemur ekki til nokkurra mála,“ segir Arthur.

„Eftir 37 ára tilraunastarfsemi Hafrannsóknastofnunar gefur hún út nánast sama upp á kíló og hún gaf út í ársbyrjun 1984 þegar þetta kerfi var sett af stað. Þetta er árangurinn,“ segir hann og bætir við að hann telji nauðsynlegt að rannsaka starfshætti Hafrannsóknastofnunar þar sem „þetta er ekki eðlilegt.“

Fram kom við kynningu á ráðgjöf Hafrannsóknastofnunar 15. júní að við endurskoðun á stofnmati í kjölfar endurmats á aflareglu var uppsetningu stofnmats breytt. Þá kom í ljós að viðmiðunarstofninn sem talinn var í fyrra vera 1.208 þúsund tonn hafi raunar verið 19% minni eða 982 þúsund tonn. Stofninn er nú talinn vera 941 þúsund tonn og samdráttur því 4,8% milli ára eða 22% miðað við stofnmatið fyrir leiðréttingu.

Frétt af mbl.is

Töluverð frávik í mati Hafró – þorskstofninn minni

„Gefur aldrei meira af sér“

„Það er eitthvað stórkostlegt að ef það er verið að reyna að telja okkur trú um það að verið sé að byggja upp fiskistofn sem gefur aldrei meira af sér ár eftir ár og áratug eftir áratug. Þeir eru búnir að hafa svo langan tíma til að sanna þessa aðferðafræði að það hálfa væri nóg, en það er samt haldið áfram að skaka í sama farinu,“ fullyrðir Arthur.

Spurður hvort félagsmenn Landssambandsins hafi haft væntingar um mótvægisaðgerðir til að milda höggið af lækkuninni, svarar Arthur að hann hafi ekki hafa heyrt marga hafa slíkar væntingar. „Ég held að margir voru að vona að hann [Kristján Þór Júlíusson] myndi halda sig við sömu tölu og er í gangi fyrir þetta fiskveiðiár.“

Frétt af mbl.is

Lýsir gríðarlegum vonbrigðum vegna ráðgjafar