„Í fyrsta lagi var mjög gott hvernig starfsfólkið allt saman brást við. Þó að það sé búið að undirbúa og skipuleggja alls konar viðbrögð er ekki sjálfgefið að allir bregðist rétt við og allir atburðir séu fyrisjáanlegir en þetta var helvíti gott. Við erum ánægð með hvernig fór og sérstaklega að enginn reyndist sýktur af Covid-19,“ segir Sigurgeir Brynjar Kristgeirsson, framkvæmdastjóri Vinnslustöðvarinnar í Vestmannaeyjum, í samtali við 200 mílur um þegar grunur um Covid-19-smit kom upp í Kap II VE-7 eins og greint var frá á 200 mílum á mbl.is í fyrradag.

Skipið var á grálúðuveiðum norðvestan af Vestfjörðum, sunnan við miðlínu til Grænlands þegar grunurinn vaknaði og voru viðbrögð áhafnarinnar þau að sigla beint til Grundarfjarðar. Öll áhöfnin fór í sýnatöku í höfninni og fengu sýnin flýtimeðferð.

Langir túrar, stutt stopp

„Þetta minnir okkur á að fara mjög varlega. Núna eru mörg skip að fara austur í Smuguna í vikutúrum og jafnvel tveggja sólarhringa stím. Auðvitað skiptir miklu máli að allir hugi að sínum sóttvörnum,“ segir Sigurgeir Brynjar.

„Við vinnum að því að afla okkur hraðprófa, svo við getum prófað sjómenn áður en þeir fara á sjó, með skömmum fyrirvara. Það er erfitt að skipuleggja í kringum svona vertíðir þar sem eru langir túrar og stutt stopp. Það er aldrei að vita nema sjómenn smitist í landi. Eins hefði, í tilfelli Kap II, verið mjög gott að hafa hraðpróf um borð úti á sjó. Þá hefði verið hægt að tjékka menn af úti á sjó og láta þá sofa úr sér úti á sjó þar sem þetta var bara flensa,“ segir Sigurgeir Brynjar.

Spurður hvort slík hraðpróf séu nægilega áreiðanleg segir Sigurgeir Brynjar að í það minnsta séu þau notuð víða um heim til að halda starfsemi gangandi. Það þurfi að þjálfa starfsfólk í notkun prófanna og í það minnsta myndu þau veita aukið öryggi. Hann segir þjónustu Landhelgisgæslunnar og heilbrigðisyfirvalda í ferlinu hafa verið til fyrirmyndar.

Frétt af mbl.is

Enginn smitaður um borð