Jacob Anthony Chansley hefur játað sök í dómsmáli gegn honum varðandi þátttöku hans þegar ráðist var inn í þinghús Bandaríkjanna 6. janúar.

Frétt af mbl.is

Hver er maðurinn með hornin?

Chansley, sem er liðsmaður öfgasamtakanna QAnon sem trúir mjög vafasömum samsæriskenningum, er einn af mörg þúsund stuðningsmönnum Trump, fyrrverandi Bandaríkjaforseta, sem reyndi að koma í veg fyrir að þingið næði að staðfesta niðurstöður forsetakosninganna sem fóru fram í fyrra. 

Chansley var mjög áberandi í þinghúsinu á meðan innrásinni stóð; var ber að ofan, málaður í framan og með stóra loðhúfu skrýdda hornum. Hann gerði samkomulag við ákæruvaldið er hann játaði sök í gær. Hann játaði að hafa reynt að stöðva þinghaldið.

AFP

Tæplega 600 manns hafa verið ákærð í tengslum við óeirðirnar. Að minnsta kosti 36 hafa játað sök, þar af 8 sem viðurkenna að hafa brotið alríkislög líkt og Chansley. 

Frétt af mbl.is

Maðurinn með hornin „of hættulegur“

Segja má að Chansley hafi orðið andlit innrásarinnar út á við. Hann hélt á bandarískum fána og kallaði sig QAnon Shaman, einskonar trúarleiðtoga samtakanna. Samtökin trúa því m.a. að Trump hafi háð leynilegt stríð gegn satanískum barnaníðingum sem starfa innan raða stjórnvalda, í viðskiptalífinu og í fjölmiðlum.