Hinn 9 ára gamli Baldvin Tómas Sólmundarson, sonur uppistandarans og fjölmiðlamannsins Sólmundar Hólm Sólmundarsonar, bræddi heldur betur hjörtu á stórtónleikum rapparans Herra Hnetusmjör á laugardag. Baldvin kom fram á tvennum tónleikum með rapparanum en að sögn föður hans var það ekki á dagskrá að stíga á svið fyrr en á staðinn var komið. 

Sóli segir frá því í færlsu á Instagram að hann hafi farið með Baldvin Tómas og Birtu, dóttur þeirra Viktoríu Hermannsdóttur, á fjölskyldutónleikana fyrr um daginn. 

„Ekki datt okkur í hug þegar við mættum að Baldvin ætti eftir að enda uppi sviði fyrir framan hundruði barna og fullorðinna að syngja lagið Þegar þú blikkar ásamt Herra Hnetusmjöri — enda ákvað Herrann það bara sjálfur að fá Baldvin upp til sín meðan hann var að syngja lagið á undan,“ skrifar Sóli á Instagram. 

Sóli segir frammistöðu Baldvins Tómasar hafa verið til svo mikillar fyrirmyndar að Herra Hnetusmjör hafi boðið honum að koma aftur um kvöldið og þar söng Baldvin fyrir tæplega þúsund manns. 

„Svo fór hann bara heim að leika sér með dót sem hann fékk í barnaboxi á Subway, nánast eins og ekkert hefði í skorist,“ skrifaði Sóli. 

Það er greinilegt að framtíðin er björt hjá hinum unga Baldvini sem var mættur í Gamla bíó í gær til að taka þátt í Jólastjörnu Björgvins Halldórssonar.