Sjúkrahúsið á Akureyri hefur lýst yfir hættustigi þar sem Covid-smitaður sjúklingur liggur í öndunarvél á gjörgæslu. Sigurður E. Sigurðsson, framkvæmdastjóri lækninga á sjúkrahúsinu, segir að viðbragðsstjórnir fundi daglega og fylgist með ástandinu.

„Það er bara þannig að í okkar viðbragðsáætlun að þegar sjúklingur leggst inn með Covid-19 á legudeild, þá förum við af óvissustigi á hættustig,“ segir Sigurður í samtali við mbl.is.

„Það þýðir að viðbragðsstjórnir funda daglega og fylgjast vel með og við þurfum kannski að gera ráðstafanir til þess að huga að því að taka við fleiri sjúklingum.“

Lagðist inn á sjúkrahúsið á mánudag

Spurður hvort ástandið sé búið að hafa áhrif á starfsemi sjúkrahússins svarar Sigurður að hættustigið sé enn svo nýtilkomið að ekki mikið hafi breyst.

„Ekki nema bara að við höfum þurft að kalla til auka starfsfólk en þetta er það nýtilkomið að það hefur ekki mikið annað breyst. Við erum að undirbúa að plan að vera með bakvaktir ef að til þess kemur.“

Hann segir sjúklinginn hafa lagst inn á sjúkrahúsið á mánudag og að í gær hefði formlega verið lýst yfir hættustigi.