„Ég vil einnig láta þess getið að ég veit að annar leikmaður liðsins fékk á sig kæru fyrir ca.2 árum þar sem hann barði og nauðgaði ungri konu í bíl í miðbæ Reykjavíkur.“

Svona hljóðar tölvupóstur sem Arnar Þór Guttormsson sendi á almennt netfang KSÍ, sem og formann, framkvæmdastjóra og fimm starfsmanna sambandsins mánudaginn 19. mars árið 2018 en þetta kemur fram í skýrslu úttektarnefndar ÍSÍ sem var opinberuð í höfuðstöðvum ÍSÍ í Laugardal í gær.

Frétt af mbl.is

Sex landsliðsmenn sakaðir um brot

Arnar Þór er faðir Þórhildur Gyðu Arnarsdóttur en hún steig fram í kjölfar Kastljósviðtals við Guðna Bergsson, fyrrverandi formann KSÍ, og greindi frá því að ónefndur landsliðsmaður hefði beitt hana ofbeldi á skemmtistað í Reykjavík sumarið 2017.

Landsliðsmaðurinn reyndist vera Kolbeinn Sigþórsson en hann var valinn í íslenska landsliðshópinn fyrir verkefni karlalandsliðsins í Bandaríkjunum í mars 2018. 

Landsliðsmaður kærður

Í tölvupóstinum vísaði Arnar einnig til þess að hann hefði vitneskju um að annar leikmaður liðsins hefði fengið á sig kæru vegna kynferðisofbeldis og líkamsárásar en tölvupóstinn má sjá hér fyrir neðan:

Ég vil einnig láta þess getið að ég veit að annar leikmaður liðsins fékk á sig kæru fyrir ca.2 árum. Þar sem hann barði og nauðgaði ungri konu í bíl í miðbæ Reykjavíkur. Sú kæra var látin niður falla. Því miður veit ég með vissu að það var ekki gert vegna þess að nauðgunin átti sér ekki stað (Ísland er lítið land).

Ég mun hins vegar ekki ræða það frekar vegna þess að ég gengst fyllilega undir þá samfélagslegu ábyrgð að maður sé saklaus uns sekt er sönnuð. Það að leikmenn sem eru með opnar ákærur hjá lögreglu eða dómsmálayfirvöldum fyrir ofbeldisbrot séu engu að síður valdir í liðið, get ég hins vegar ekki sætt mig við og ég á frekar von á því að íslenska þjóðin sé á sama máli og jafnvel erlendir aðdáendur íslenska knattspyrnuundursins. Í Skandinavísku velferðar samfélagi gengur ekki að hetjur og fyrirmyndir unga fólksins okkar séu í raun og veru nauðgarar og ofbeldismenn, það endar ekki vel.

Ég vænti þess að skýr skilaboð verði send til leikmanna allra liða um að ofbeldi verði ekki liðið hvort sem er innan eða utan vallar. Einnig vona ég heitt og innilega að ofbeldis og nauðgunarmenning verði gerð útlæg úr íslenska fótboltanum með öllum ráðum.

Með vinsemd og virðingu, Arnar Þór Guttormsson, sonur konu, eiginmaður konu og faðir konu (og einnig faðir pilts sem elskar fótbolta)

Samkvæmt heimildum mbl.is er umrætt mál nú á borði samskiptaráðgjafa íþrótta- og æskulýðsstarfs og er framtíð leikmannsins með íslenska liðinu í mikilli óvissu.