Hulda Björk Svansdóttir og sonur hennar, Ægir Þór Sævarsson, skemmta sér alla föstudaga með því að dansa fyrir sjúkdóminn Duchenne. Mæðginin fengu Ólaf Stefánsson handboltastjörnu til að dansa með sér í dag. 

„Við Ægir höfum verið að njóta þess að horfa á landsliðið okkar keppa á Evrópumótinu og langaði að gera skemmtilegt myndband fyrir strákana til að styðja þá. Ég verandi fröken hvatvís og óskipulögð fékk þá snilldarhugmynd að prófa að hringja í Ólaf á síðustu stundu til að athuga hvort hann vildi leggja dansa fyrir Duchenne og strákana okkar. Ég hugsaði með mér að það væri sennilega galið að ætla að hann gæti gert þetta með svona stuttum fyrirvara en annað kom nú á daginn. Ólafur eins dásamlegur sem hann er svaraði játandi og við hentum í þetta dásamlega myndband á 10 mínútum. Það var ekki verið að flækja hlutina neitt. Ef maður ætlar að láta eitthvað gerast verður maður að þora að spyrja er mottóið mitt,“ segir Hulda Björk sem berst með kjafti og klóm fyrir son sinn.