Fulltrúar Réttlætis, sem er hópur fólks sem var vistaður á vöggustofur sem börn, hafa gert athugasemdir vegna „bagalegra“ vinnubragða borgaryfirvalda í tengslum við frumvarp til laga um heimild Reykjavíkurborgar til að skipa nefnd til að kanna starfsemi vöggustofa. Að öllu óbreyttu verður að mati Réttlætis ekki séð að úr geti orðið rannsókn í þeim anda sem borgarstjóri hét.

Hinn 18. mars sátu fulltrúar Réttlætis fund með borgarlögmanni og borgarritara. Efni fundarins var að ræða markmið og meginverkefni fyrirhugaðrar nefndar samkvæmt útlistun borgarráðs.

„Þessi markmið og meginverkefni fyrirhugaðrar rannsóknarnefndar eru að mati Réttlætis röng og illa skilgreind þar sem ekkert er fast í hendi. Raunar verður alls ekki séð að „athugun“ sem grundvallast á uppgefnum markmiðum skili markverðum niðurstöðum,“ segir í opnu bréfi Réttlætis til borgarstjórnar. 

Frétt af mbl.is

Segja markmið borgarinnar ófullnægjandi

Skilningsleysi á starfsháttum

Réttlæti telur að eftirfarandi markmið borgarráðs beri með sér skilningsleysi á starfsháttum vöggustofa borgarinnar:  „Að leitast við að staðreyna eins og kostur er hvort og þá í hvaða mæli börn sem vistuð voru á stofnuninni hafi sætt illri meðferð...“

„Það er óumdeild staðreynd, studd með mörgum rannsóknum, að starfshættir þeir sem tíðkuðust á vöggustofum borgarinnar buðu ekki upp á annað en skaðlega og illa meðferð á öllum börnum sem þar voru vistuð. Í því fólust m.a. mannréttindabrot og brot á landslögum. Þetta atriði er útgangspunktur og því þarf ekki að rannsaka sérstaklega „hvort“ heldur „hvers vegna“,“ segir í bréfi Réttlætis. 

Vonbrigðin gífurleg

Grundvallarspurningar sem rannsókn á starfssemi vöggustofanna þarf að svara að mati Réttlætis eru meðal annars; hverjar voru ástæður þess að börn voru vistuð á vöggustofum borgarinnar? Hver var ástæða þess að stórskaðlegir starfshættir, sem gengu þvert gegn fyrirliggjandi rannsóknum, heilbrigðri skynsemi og mannlegu eðli, voru við lýði á vöggustofum borgarinnar? Hvernig þrifust börn á meðan þau voru vistuð á vöggustofum borgarinnar?

„Vonbrigðin með vinnubrögð borgarinnar í þessu máli eru gífurleg. Að öllu óbreyttu þá verður ekki með nokkru móti séð að úr verði alvöru rannsókn eins og lagt var upp með og borgarstjóri lofaði. Allt er þetta mannanna verk og því eru röng og illa skilgreind markmið og meginverkefni fyrirhugaðrar rannsóknarnefndar ekkert náttúrulögmál sem ekki er hægt að hrófla við. Það er von Réttlætis að borgaryfirvöld leiðrétti augljós mistök og endurskilgreini markmið og meginverkefni nefndarinnar,“ segir í bréfi réttlætis.