„Margir af þessum viðburðum hefðu ekki átt að fá að eiga sér stað,“ segir í skýrslu um þau sóttvarnabrot sem framin voru af Boris Johnson, forsætisráðherra Bretlands, og fólki sem ríkisstjórn hans tengist.

Frétt af mbl.is

Gestir í Downingstræti 10 sátu í fangi hvers annars

Sue Gray, háttsettur opinber starfsmaður, vann skýrsluna. Hún segir að ríkisstjórnin verði að bera ábyrgð á þeirri menningu sem leyfði brotunum að eiga sér stað. 

Skýslan kom út í dag og hefur Johnson brugðist við henni með því að segja að hann taki fulla ábyrgð á öllu sem hafi gerst á hans vakt en hann bað þingmenn í kjölfarið um að „halda áfram veginn.“ Þá sagði Johnson að hann hefði mætt á fæsta viðburðanna þar sem sóttvarnabrot voru framin og tók fyrir að hann hefði nokkurn tíma logið að þingmönnum.

Grín gert að starfsfólki sem lét í sér heyra

Keir Starmer, leiðtogi Verkamannaflokksins, sagði að skýrslan sýndi fram á að ríkisstjórn Bretlands hafi fyrirlitið fórnir almennings í kórónuveirufaraldrinum.

Með skýrslunni birti Gray ljósmyndir þar sem Johnson sést skála við starfsfólk. Í skýrslunni greindi hún frá veislum sem stundum teygðu sig fram á rauða nótt. Þá upplýsti hún um að grín hafi verið gert að öryggis- og ræstingastarfsfólki í Downingstræti þegar það reyndi að mótmæla framkomu starfsmanna þar. 

„Þau í forystunni, bæði pólitískri og opinberri, sem voru stödd í þungamiðju þessa alls verða að bera ábyrgð á þessari menningu,“ skrifaði Gray.