Stefán Broddi Guðjónsson hefur verið ráðinn sveitarstjóri Borgarbyggðar og er áætlað að hann taki við starfinu þann 1. júlí næstkomandi. Hann segir í samtali við mbl.is að starfið leggist ljómandi vel í sig.

„Ég hlakka til að taka til starfa í sveitarfélagi sem býður upp á fjölmörg tækifæri. Ég á rætur í Borgarnesi og Borgarbyggð, ég ólst þar upp. Ég er spenntur fyrir þessu tækifæri, að fá að vinna með góðu fólki að góðum verkefnum.“

Stefán er með BA-gráðu í stjórnmálafræði frá Háskóla Íslands en hefur starfað hjá Arion banka síðastliðin tíu ár. Frá árinu 2019 hefur hann verið sérfræðingur í markaðsviðskiptum hjá bankanum en þar áður stýrði hann greiningardeild bankans um nokkurra ára skeið.

Stefnir á búsetu í Borgarbyggð

Stefán er ekki búsettur í Borgarbyggð eins og er en hann hefur sterkar taugar þangað. „Ég stefni að minnsta kosti að búsetu og lögheimili í Borgarbyggð en á þó eftir að útfæra það í samstarfi við fjölskylduna.“

Hann bendir á að stutt sé á milli Borgarbyggðar og höfuðborgarsvæðisins.

„Borgarbyggð er þannig sveitarfélag að við erum innan við klukkutíma frá borginni. Fjarskipti eru góð og svo halda samgöngur áfram að styrkjast. Við erum sveitarfélag í jaðri höfuðborgarsvæðisins. Við erum að fá fólk til okkar sem vinnur á höfuðborgarsvæðinu og öfugt,“ segir Stefán.